BACOLOD CITY – Ginahulat na ang resulta sang autopsy sa bangkay sang Overseas Filipino Workers (OFW) nga napatay sa Hongkong.
Sa pahayag ni Bombo Correspondent sa Hongkong, Merly Bunda , subong nga adlaw gina lauman nga magaguwa na ang autopsy result sa bangkay ni Leonita Quinto, 46-anyos, dalaga kag tumandok sang Old Pedro Village, Sagay City nga napatay sa balay sang iya amo tinalikdan nga Abril 4.
Si Quinto ang apat pa lamang ka bulan nga naga-trabaho sa Hongkong, apang naka-trabaho naman ini sa Bahrain kag Singapore.
Isa sa gina lantaw nga rason sa kamatayon sang nasambit nga OFW amo ang tuman nga kakapoy sa trabaho sa sulod balay.
Ini matapos na-istorya ni Bunda si Imelda Quinto, ang utod ni Leonita nga nag apas sa Hongkong agud asaikasuhon ang bangkay sang utod.
Suno kay Bunda, naka-istorya kay Imelda si Leonita nga ala-1:30 sang kaagahon na ini nagatulog kag nagabugtaw naman pagka-alas-5:30 sang kaagahon agud magtrabaho.
Nahibaluan nga Abril 3 sang nagreklamo si Leonita sa employer sini nga naga-sakit ang iya ulo gani gin papahuway ini kag, pagka-aga gin pukaw ini nga mag preparar sang pamahaw apang nagasakit pa ang iya ulo kag gin papadayon ini sa pagpahuway.
Apang sang gin balikan ini sang iya employer pasado 12:00 sa udto wala na ini sang pangalibutan kag patay na sang nag-abot sa Princess Margareth Hospital.
Suno pa kay Bunda, tinalikdan nga Marso 19 naghatag na si Leonita sang 1 month notice sa employer sini nga maga break na ini sang kontrata bangud sang posible tuman nga kakapoy sa trabaho.
Ginalauman nga maga-abot ang bangkay sang OFW sa Bacolod-Silay Airport sa Abril 28 kag iga-pauli ini sa ciudad sang Sagay.
Ginahikutar naman sa karun sang utod ni Leonita ang mga claims sini sa iya nga employer.
