Nagpadala sang formal request ang AVM Bernardo Slaughterhouse kay Bacolod City Mayor Greg Gasataya nga nagarequest sang 10-year extension sa ila Build-Operate-Transfer agreement sa City Government.
Nahibaluan nga maga-expire ang ila Memorandum of Agreement sa Agosto 31, 2028, makaligad sang 20 ka tuig nga operasyon nga nag-umpisa sang 2008.
Sa interview sang Bombo Radyo Bacolod kay Atty Karol Joseph Chiu, head sang Bacolod City Legal Office, matapos mabatun ni Mayor Greg ang sulat, ini ang iya ginpadala sa City Legal Office agud matun-an.
Panindugan sang AVM Bernardo nga sa BOT agreement, sila ang nag-invest para sa mga kagamitan kag improvements.
Apang bangod sa pandemic kag pagnubo sang supply sang ginapa-ihaw bangod sa African Swine Fever (ASF) sila ang wala pagid gihapon makabawi sa ila gingasto.
Madumduman nga sila ang ginpadal-an naman sang tinalikdan sang demand letter ni Mayor Greg matapos matukiban nga sila ang tinuig na nga wala nagaremit sa ciudad.
Ini ang amat-amat naman nila nga nabayaran.
Sila ang nagarequest sang 10-year extension sa kontrata agud nga bisan paano makabawi sang ila nga investment.
Apang antes ikonsiderar ang request, lantawon man anay ang nangin performance sang contractor sa pila ka tuig nga pagserbisyo.
Nahibaluan nga tubtob sa karun Double A lamang gihapon ang category sang slaugtherhouse, imbes nga dapat na-upgrade na sa Triple A.
Ang pasilidad ang wala pa sang chicken dressing house ukon ilihawan sang manok, nga nakapagkit man sa kontrata.
Nahibaluan nga may-ara naman sang proposal nga ang ciudad na lamang ang mag-operate sang slaugtherhouse kag indi na magkuha sang private company nga magadumala.
Suno kay Chiu sila ang magahimo lamang sang rekomendasyon, kag ang request ang pagadesisyonan pa sang Sangguniang Panlungsod.
