BACOLOD CITY — Natalana na nga pasakaan sang kaso ang nag-AWOL ukon Absent Without Official Leave nga pulis kag tatlo ka iban pa matapos nga nadakpan sa buybust operation sang kaangay man nga pulis kagab-i.
Si PO3 Clyde Dulaca, 45-anyos kag katapo sang Special Action Force ukon SAF ang nadakpan sa operasyon nga ginpatigayon sa Purok Paloma, Brgy. 16 sa siudad sang Bacolod, pasado las 10:00 ang takna kagab-i.
Kaupod sini nga nadakpan sanday Agiemon Padilla, 28-anyos nga amo ang subject sang operasyon; Gracel Carian, 37-anyos kag Chad Mariano, 21-anyos.
Suno kay Police Senior Inspector Leo Estopa, station commander sang Bacolod City Police Station 1, si PO3 Dulaca ang anay assigned sa SAF headquarters sa Camp Bagong Diwa sa Bicutan, Taguig City apang ini ang nag-AWOL.
Na-aktuhan mismo ang apat samtang naga-pot session sa isa ka puloy-an sa Purok Paloma, Brgy. 16 sa siudad sang Bacolod.
Na-rekober ang kalibre 45 nga armas–luthang kag anum ka wala pa nakalupok nga bala sa possession ni Dulaca.
Nakuha man ang lima ka mga magamay nga sachet sang ginasuspetsuhan shabu kag mga drug paraphernalia.
Suno kay Estopa, ang mga arestado ang pasakaan sang kaso nga paglapas sa Section 5, 11 kag 12 sang RA 9165 ukon Comprehensive Dangerous Drugs Act of 2002.
