Patay ang 38 anyos nga babayi nga barker sang jeep matapos ginluthang sa Purok Lubi, Barangay 3, Bacolod City kaina sang kaagahon.
Sa interview sang Bombo Radyo Bacolod kay Jemar Mercado, nagabaligya sa tiyangge, ang biktima nga ginkilala nga si Mary Jane Co ang nagbakal sa iya sang gatas kapin alas-10:00 kagab-i, kag nagbalik sang kaagahon agud magbayad sa kulang nga P4.
Kapin alas-3:30 sang kaagahon, samtang siya ang nagalantaw sa isa ka babayi nga ginabuligan pasakay sa tricycle bangod hinali na lamang nga ginkurog, didto naman natabo ang pagpangluthang.
Suno diri, siya ang nakabati sa duha ka lupok sang armas-luthang.
Dugang pa sini nga duha ang suspect kag lunsay nakajacket kag may tabon nga itom ang nawong.
Indi man sini segurado kun may motorsiklo ang mga ini bangod nagalakat lamang sang iya makit-an.
Suno diri, kapit duha ka semana naman nga nagabakal-bakal sa ginabantayan nga tiyange ang biktima, kag maayo man ang pagkakilala sini bangod nagabayad gid kun may kulang sa kwarta.
Samtang wala na sini mahibaluan kun ano ang natabo sa babayi nga ginakurog bangod siya ang nagdalagan man sang matabo ang shooting incident.
