Gina-alegar nga family business na sang babayi nga nadakpan sa drug buybust operation sa Prk Sigay, Magsungay, Brgy Singcang-Airport, Bacolod City ang pagbaligya sang illegal nga droga.
Naaresto sang mga katapo sang Bacolod Police Station 8 si Alyas Neneng, 40 anyos, single, residente sa lugar alas-3:00 kaina sang kaagahon.
Narecover gikan diri ang isa ka knot tied transparent plastic bag, kag tatlo ka elongated kag lima ka big heat-sealed transparent plastic sachet sang suspected shabu.
Ang suspected shabu ang ginabanta nagabug-at sang 51 gramos, nga may standard drug price nga P346,800.
Sa interview sang Bombo Radyo Bacolod kay Police Lt. Ildelfonso Leonardo Jr., officer in charge sang Bacolod Police Station 8, madamo na sa mga himata ni Neneng ang una na nga napriso bangod man sa pagbaligya sang illegal nga droga.
Gani matawag na nila ini nga family business, kun sa diin si Neneng ang isa sa nagsalo sang illegal nga negosyo.
