Nalapakan sang truck ang tiil sang babayi nga naglabog nagikan sa motorsiklo nga nakabunggo sa ido sa Sitio Mantamilok, Purok 7, Barangay Isio, Cauayan, Negros Occidental.
Suno kay P/Corp. Rayzen Rivera, imbestigador sang Cauayan Municipal Police Station, nagabyahe sanday Elmer Dave Care, 17 anyos; iloy sini nga si Emalyn Caro, 38 anyos kag si Claire Loreto Itamon, 21 anyos lunsay mga residente sa Purok 4, Barangay Camalandaan, Cauayan, Negros Occidental sakay sa motorsiklo.
Magapadulong kuntani ang mga ini sa Barangay Poblacion agud mag-eskwela sa TESDA.
Apang pagdangat sa Sitio Mantamilok, Purok 7, Barangay Isio takna alas-8:00 sang aga, hinali nalang sila nga nakabunggo sa ido.
Bangod sa pagkabunggo, nagtabog si Claire nga yara sa likod nga bahin nakasakay padulong sa pihak nga lane.
Ang kadungan man nga sugata sang mga ini ang isa ka truck nga nakalasak sa nawala nga tiil sang biktima.
Wala naman ang truck sang karga bangod natapos na ini sa pag-unload.
Samtang indi pa man maseguro ni Rivera kun ginakinahanglan utdon ang tiil bangod yara na sa doktor nga magalantaw diri ang desisyon.
Nag-areglo naman ang driver sang truck nga ginkilala kay Joebert Abelo sa pamilya sang biktima kag nagpasalig nga nakahanda ini nga magkooperar kun kinahanglan.
Naintindihan naman ini sang pamilya bangod sa indi hungod kag aksidente ang pagkalapak sang salakyan sa biktima gani gilayon man nga ginpagwa ang driver.
