Patay ang babayi nga nurse matapos ginluthang sang iya bana nga isa man ka nurse sa Dumaguete City, Negros Oriental kahapon.
Sa interview sang Bombo Radyo Bacolod kay Police Lt. Stephen Polinar, spokesperson sang Negros Oriental Police Provincial Office, ang insidente ang ginapahayag natabo kapin alas-6:00 tubtob alas-7:00 kagab-i apang pasado alas-3:30 na kaina sang kaagahon nareport sa kapulisan.
Sa imbestigasyon, ginalantaw nga may nagluntad nga argumento sa mag-asawa sa sulod sang salakyan nga nagresulta sa pagpangluthang.
Ang 36 anyos nga biktima ang nakaangkon sang samad sa iya liog nga gintunaan sang iya kamatayon.
Ang babayi ang nahibaluan nga tumandok sang Pangasinan samtang ang bana nga 39 anyos ang residente sa nasambitan nga ciudad.
Nasapwan ang salakyan sa Bag-ong Taytayan, Barangay Tabuc-tubig, Dumaguete City kun sa diin yara sa passenger seat ang biktima.
Matapos ang krimen gilayon man nga nagpalagyo ang suspect kag nagpanago sa iya nga abyan.
Apang ang abyan ang nagreport sa kapulisan, gani ini ang ginrespondihan kag ang suspect ang gilayon man nga nagsurrender.
Suno kay Polinar, tubtob sa karun wala nagasugid ang bana kun sa diin sini gintago ang gingamit nga armas luthang.
Samtang suno diri, third party ang ila ginbaisan nga nagresulta sa shooting incident.
