Patay na sang nasapwan ang isa ka babayi sa Sitio Bugtong Lubi, Barangay Damutan, Banwa sang Hinobaan sang Martes sang aga, December 24.
Ginkilala ang biktima kay Arlyn Magbanua, 30-anyos, isa ka vendor kag residente sang nasambit nga lugar.
Sa interview sang Bombo Radyo Bacolod kay Police Major Jaynick Bermudez, hepe sang Hinoba-an Municipal Police Station, naglisensya ang biktima sa iya bana nga manglaba ini sa suba nga kapin 200 metros ang kalayuon sa ila balay.
Suno kay Bermudez, nagpasugot ang bana bangud makadto man ini sa ila barangay hall.
Apang mga alas 7:00 ang takna sang aga, ginpahibalo ang bana nga nakita ang biktima nga wala na sang kabuhi kag may pilas sa dughan nga tuga sang pagpamuno.
Una nga ginlantaw sang mga kapulisan nga mahimo ginhimuslan ang biktima apang nakita sa resulta sa ginpatigayon nga autopsy nga wala sang nakita nga senyales nga ini ang ginhimuslan.
Blanko pa sa karun ang mga kapulisan sa motibo sa pagpatay sa biktima.
Nagpanugyan man si Bermudez sa bana nga kun nahibaluan na sini ang may kahimuan sa pagpatay sa iya asawa magkoordinar lamang sa mga kapulisan agud mapasakaan sang kaso.
