Ginpanindugan sang Bacolod Alliance of Commuters Operation and Drivers (BACOD–Manibela) nga indi magpasaka sang plete ang ila mga miyembro apisar nga mapatuman na ang ginapaabot nga bigtime fuel price hike.
Sa interview sang Bombo Radyo Bacolod kay BACOD-Manibela President Rudy Catedral, ginsapol nila ang tanan nga miyembro kahapon sa Bacolod City kag pila ka bahin sang Negros Occidental.
Suno kay Catedral, nagadangat na sa P300 tubtob P400 ang nagakadula sa income sang mga drivers kada adlaw, kag magadako pagid sa pagpatuman sang bigtime fuel price hike.
Apang sa pihak sini, sila ang indi magpasaka sang plete bangod indi nila luyag nga pas-anon pa sang mga commuters ang problema.
Pahayag ni Catedral nga antuson nalang anay sang ila mga miyembro ang kabug-at sang fuel crisis, bangod nahangpan man nila ang mga commuters, kag sila ang may mga pamilya man nga nagacommute.
Bisan pa magtanyag ang Land Transportation Franchising and Regulatory Board sang saka sa plete, ini ang indi man nila gihapon tumanon.
Suno kay Catedral, P13 ang minimum fare sa Bacolod City para sa traditional jeepney, kag P15 sa modernized jeepney.
Apang kun may magbayad nga estudyante sang P10, ini ang ginabatun na lamang sang mga drivers.
Sa baylo nga ipasa sa commuters ang epekto sang fuel crisis, ginapanawagan nila ang paghulag gikan sa National Government, partikular na ang pagfreeze sang fuel excise tax kag paghatag sang fuel subsidies.
Suno diri, kun magpasaka sang plete, ini ang may domino effect bangod ang mga workers ang magademand man sang saka sa sweldo kag ang chamber of commerce ang mahimo naman nga magbuhin sang tawo agud macater ang mas mataas nga sweldo sa empleyado.
Luwas sa bulig gikan sa National Government, sila ang naga-apelar man sa Bacolod City Government nga kun may mahatag nga dugang nga bulig, kaangay sang calamity assistance.
