Magaset-up sang team nga magamonitor sang fuel prices sa nagkalainlain nga fuel stations sa Bacolod City agud maseguro nga wala sang may nagapasaka sang presyo antes paman ang scheduled price adjustment.
Sa interview sang Bombo Radyo Bacolod kay Councilor Bobby Roxas, chairperson sa Committee on Energy and Public Utilities sa Sangguniang Panlungsod, madamo ini sang nabatun nga report tuhoy sa mga fuel stations nga nagpatuman na sang pagsaka apisar nga wala pa ang aktwal nga implementasyon.
Monitoron sang team ang fuel prices sang kada fuel stations sa kada adlaw agud makita kun may-ara sang pagbag-o kag ang findings ang ireport sa Department of Trade and Industry kag Department of Energy.
Seguraduhon man nila nga madisiplina ang mga nagapamintaha nga negosyante.
Pasalig sini nga sa pihak sang fuel crisis, ang ciudad ang magabantay agud indi ma-abusaran ang mga naga-antos na ngadaan nga mga pumuluyo… Samtang nagalibot man kag nagamonitor sa presyo sang mga fuel products ang mga kapulisan.
Sa interview sang Bombo Radyo Bacolod kay Bacolod City Police Office Spokesperson Police Captain Dax Santillan, ini ang santo sa mando gikan sa Philippine National Police (PNP) Headquarters.
Apang sila ang nagakoordinar pa sa Department of Energy kag Department of Trade and Industry.
Suno diri, wala pagid matul-id kun ano ang role sang kapulisan sa price monitoring kag kun sila ang hatagan sang otoridad nga manakop kun may matukiban nga nagabayolar.
Sa karun wala pa sang may nabatun nga formal complaint ang BCPO tuhoy sa mga fuel companies nga nagpasaka sang presyo apisar wala pa ang pagpatuman sang bigtime fuel price hike.
Apang gin-alarma na nila sa mga police stations nga gilayon nga ipalab-ot sa BCPO headquarters kun makabatun sang kaangay nga report.
