Ginpamatud-an sang Bacoleño nga miyembro sang Philippine National Police Academy (PNPA) Mandayug Class 2020 nga malab-ot gid ang handom basta nagahimakas.
Si Fire Inspector Joebert Sanao sang Barangay Taculing, Bacolod City ang ika-12 sa 13 ka mag-ulutod kag naga-edad pa lamang ini sang 10 ka bulan sang nagtaliwan ang ila amay.
Suno kay Sanao, nagapamugon ang iya amay antes ini napatay samtang housewife naman ang iya iloy nga si Jocelyn.
Sa pihak sang kapigaduhon, nag-eskwela si Sanao sa Bago City College sa kurso nga BS Criminology.
Bangud wala na sila sang amay, nagtinguha ang iya mga magulang nga makatapos sa pagtuon kag nagtrabaho agud nga mapaeskwela ang mga manghod.
Sa karon, nakatapos na sila tanan sa pagtuon kalakip ang ila agot nga subong man nga tuig naggraduate sa kolehiyo.
Suno kay Sanao, handom gid niya nga makasulod sa PNPA agud wala na sang gasto ang iya pamilya.
Tuman naman ang pasalamat sini sa iya iloy kag sa bilog nga pamilya kun sa diin naka-dedicate ang iya kadalag-an.
Suno diri, makabulig na siya sa ila pamilya subong nga miyembro na ini sang Bureau of Fire and Protection (BFP).
Nagpanugyan naman ini sa mga estudyante nga indi magpangduha-duha nga magkuha sang exam sa PNPA kag updan sang pangamuyo bangud wala sang imposible basta nagatuo.
Nagpasalamat man ini nga bisan may COVID pandemic, natigayon kahapon ang ila virtual graduation nga ginpangunahan mismo ni Presidente Rodrigo Duterte.
