BACOLOD CITY — Nagahilibion ang iloy ni Police Cadet Fritz John Vallador samtang nagapamati sa iya valedictory address sa graduation rites sang Philippine National Police Academy, Miyerkules sang hapon.
Sa interview sang Bombo Radyo kay Ana Maria Vallador direkta sa Marbella, Spain, ginpahayag sini nga mixed emotions siya samtang nagasaksi sa graduation rites sang anak paagi sa social media.
Bisan nagaisahanon lamang ini, nagatulo ang luha ni Ana Maria samtang nagapamati sa speech sang iya subang nga anak.
Tuman ang kalipay sini sa nalab-utan sang iya anak apang nasubuan man ini bangud wala siya nakapauli agud magtambong sa graduation rites.
Nahibaluan nga wala ginpahanugutan sang iya amo si Ana Maria bangud sa kontrata nga iya ginpirmahan.
Nablangko naman ang iloy sang iya nabatian nga ginhatagan ni Presidente Rodrigo Duterte sang house and lot ang ila pamilya.
Ini bangud aminado si Ana Maria nga nagatipon sila sang anak sang kwarta agud nga makabakal sang kaugalingon nga balay.
