Masobra P150,000 ang initial nga balor sang halit nga natuga sang nagluntad nga sunog sa STI-West Negros University kahapon sang aga.
Sa interview sang Bombo Radyo kay Bacolod City Fire Marshal Fire Chief Inspector Publio Ploteña, ginpahayag sini nga nagadangat sa P150,000 ang balor sang halit nga ginbilin sang sunog sa School of Basic Education.
Ginkompirmar man ni Ploteña nga sa stock room sa ikaduha ka panalgan sang building nga ginagamit sang elementary department nagsugod ang sunog apang wala pa nahibaluan kun ano gid ang gintunaan sini.
Base sa ila imbestigasyon, ginpaathag sang fire marshal nga in compliance kag yara man sa husto ang pagplastar sang building sa nasambit nga unibersidad.
Gina-engganyo man sang City Disaster Risk Reduction Management Council ang padayon nga pagconduct sang fire drill sa Bacolod.
Suno kay Dondon Parandas, Officer-in-Charge sang CDRRMO, preparado ang mga estudyante kag pagsugod pa lang sang kalayo, nag-evacuate na ang mga ini gani gina-engganyo sini ang publiko nga padayunon ang pagconduct sang fire drill bangud nakita sini nga dako gid ang mabulig sang drill sa kadam-an.
Suno sa iya, sa mga tinion nga may yara sang sunog kaangay sang natabo sa STI-West Negros University kahapon sang aga, ang tagsa-tagsa lang ang makabulig sa ila nga kaugalingon gani dapat gid nga makahibalo sang ila pagahimuon.
