Nagpasalig ang City Administrator sang ciudad sang Bacolod sa mga market vendors nga sa oras nga magpositibo ang mga ini sa COVID-19 kag nagakinahanglan nga dal-on sa isolation facility, magahatag sang supporta ang ciudad sa mabilin sini nga pamilya.
Madumduman nga madamo sang mga market vendors nga nagapamalibad sa swab testing sa tatlo ka mayor nga merkado sa Bacolod bangod sa kahangawa nga mapabay-an kag wala sang makaon ang mga mabilin nga pamilya kun dal-on na ang mga ini sa nagakaigo nga pasilidad.
Suno kay City Administrator Em Ang, oras nga magpositibo ang isa ka persona, kasubong man nga ginakunsiderar nga direct contact ang mga kaupod sini sa balay.
Pagakuhaan man ang mga ini sang swab sample kag indi mapahanugutan nga makagwa sa puluy-an tubtob sa mag-abot ang resulta.
Samtang nagahulat, pagahatagan naman ang mga pamilya sang foodpacks.
Ginkumpirmar naman sang City Administrator nga ang ideya sang swab testing sa mga merkado ang nagikan mismo sa alkalde nga gin-ugyunan naman sang mga opisyales kaupod na sang mga representante nga ginpadala sang National Government.
Paathag naman sini nga tinutuyo ni Bacolod City Mayor Evelio “Bing” Leonardia amo ang makabulig kag luyag lang nga mangin hilway na sa balatian ang ciudad.
Ginalauman naman sang programa nga ma pinpoint kun sin-o ang mga positibo sa virus nagikan sa mag merkado kag gilayon nga ma-isolate.
Sarang naman sini nga mapanubo ang cases sa Bacolod agud nga mabuksan naman ang ekonomiya.
Suno kay Ang, kun magbukas ang ekonomiya ang mag market vendors man sa gihapon ang nagapanguna nga makabenipisyo.
Kun matabo ini, liwat na nga mabalik ang pampubliko nga transportasyon, kag makabalik naman ang mga tawo gani may-ara na sang kwarta agud nga ibakal sa mga merkado.
Nagapati si Ang nga ang pinakamaayo nga tikang agud matapna ang paglapta sang COVID-19 amo ang pagprebentar sini.
Ang estratehiya naman nga ginadihon sang ciudad amo ang mas agresibo nga testing, contact tracing kag isolation.
