Nagapanawagan ang Sangguniang Panlungsod sa ciudad sang Bacolod sang hugot nga implementasyon sang Anti Bullying Ordinance kag School Safety Measures sa ciudad.
Suno kay Bacolod City Councilor Atty Caesar Distrito, ginpahayag sini nga dapat hugton pa gid ang pagpatuman sang Anti Bullying Ordinance kag dapat may tikang para sa Child Protection kag School Safety sa tanan nga pambubliko kag pribado nga eskwelahan.
Suno sa Konsehal, gin-aprubahan kahapon ang resolution kun sa diin ginahingyo ang DepEd Division of Bacolod City, Bacolod City Police Office, Department of Social Welfare and Development DSWD, City Health Office kag iban pa nga ahensya nga paglig-onon ang pagpatuman sang Anti Bullying Ordinance.
Ini bangud nagapati si Atty Distrito nga kun may existing protocol, ang mga kabataan ang may dangpan kun sila ang biktima sang bullying kag ang insidente sang mga pagpanimalos ang indi na matabo.
Hingyo man sini nga palig-unon ang mga security protocols kag mga necessary measures agud malikawan ang mga indi maayu nga nagakatabo.
Bangud suno kay Atty Distrito, ang mga ginikanan ang nagalaum nga ang ila mga kabataan ang luwas sa sulod sang eswkelahan.
Nagapati ang konsehal nga ang kaangay nga insidente ang indi na matabo kun ang tanan nga ahensya sang gobyerno ang magbinuligay sa hugot nga pagpatuman sang nasambit nga layi.
