Ginpanginwala sang City Engineer’s Office sang Bacolod nga substandard ang mga materyales nga gingamit sa pagpatukod sang Halandumon Tower sa corner Gatuslao-Gonzaga Streets.
Kagab-i, nabungguan sang SUV ang Halandumon Tower kag nabuslot ang isa ka bahin sini.
Diri nakit-an nga tuman kanipis ang semento, hollow kag magagmay man ang kabilya nga gingamit.
Bangud sini, ginakwestyon sang mga Bacoleño ang indi maayo nga konstruksyon sang tower bisan masobra P4.8 million ang pondo nga ginpain sang city government para diri sang tuig 2019.
Sa interview sang Bombo Bacolod kay Engr. Leuben Ceballos, project manager sang Halandumon Tower, ginpahayag sini nga ginhungod nga nipison ang walling sang tower agud malikawan ang tuman nga kabug-at sini.
Suno kay Ceballos, may mga dalagko nga tubo nga ginbutang sa tower bilang pundasyon sini kag may yara man sang steel frame sa sulod sang tower.
Gindula man sini ang kahangawa nga madali maguba ang tower bangud suno kay Ceballos, may angle bars kag steel beam sa sulod sini.
Sa karon, ginahulat pa nga makaayo sang kontraktor ang lumineers sa tower agud nga makasiga na ini liwat.
Sa pihak sini, nagadepende na sa driver sang SUV kag sa contractor sang Halandumon Tower ang arrangements matapos mabungguan kag nawasak ang portion sang tower.
