May ginpreparar nga sorpresa kag papremyo ang Bacolod City Government para sa ikatatlo nga New Year Countdown nga patigayonon sa BCGC grounds apisar nga wala si Mayor Alfredo ‘Albee’ Benitez sa selebrasyon.
Ang tema sang selebrasyon amo ang ‘High five to 2025’.
Suno kay Secretary to the Mayor Atty Marty Go, may ginpreparar nga programa ang ciudad para sa Bacolodnons kaangay sang acoustic band, comedy show, minor kag grand raffle, kag fireworks display.
Ang raffle ang ginalakipan sang premyo nga mga appliances kag ang grand prize amo ang brand new car.
Ang mechanics sa pag-intra sa raffle amo nga bukas ini sa tanan nga Bacolodnon nga naga-edad sang 18 anyos pasaka; nakafill-out sa registration kag magpakita sang valid ID; BACCHP holder, senior citizen, PWD automatic nga sulod na sa raffle; i-like kag i-follow ang FB page sang alkalde.
Ang major prize winner ang icontact kag kun indi magsabat ini ang iforfeit kag mapili sang bag-o nga winner.
Sa pagclaim naman dapat nga may ipresent nga ID nga parehas sa ID nga ginpresent sa registration.
Isa lang ka tawag ang ihatag nga kahigayunan sa winner kag sa 20 segundos nga busy ukon cannot be reached ang linya, liwat nga tawagan ini apang kun indi sa gihapon masabat, mapili na sang bag-o nga winner.
Samtang, lauman naman ang presensya ni Vice Mayor El Cid Familiaran, Bacolod City Lone District Conrgressman Greg Gasataya, kag mga City Councillors.
