Nagakoordinar na ang Bacolod City Government sa tanan nga mga ahensya kag opisina nga involved sa opening of classes sa Lunes.
Sa interview sang Bombo Radyo Bacolod kay Bacolod City Administrator Atty Mark Steven Mayo, nagmeeting na sila kahapon upod si Bacolod City Mayor Greg Gasataya kag ang Department of Education division of Bacolod City officials.
Suno diri, isa na sa gina-antisipar sa pagbukas sang klase ang pagbug-at sang trapiko.
Gani sila ang nagpadala na sang communications sa Bacolod Traffic and Transportion Management Department (BTTMD) sa pagseguro sang deployment sang mga traffic personnel sa mga strategic locations, partikular na sa mga eskwelahan.
Nakig-angot naman sila sa Bacolod City Police Office para sa seguridad sang pila ka buluthuan.
Kasubong man sa Office of the Building Officials, nga ginpapreparar naman nila inkaso may mga buluthuan nga magrequest sang building inspection sa ila mga pasilidad, kaupod sa Bacolod City Engineer’s Office.
Preparado naman ang Bacolod City Disaster Risk Reduction and Management Office sa pag-augment kun may mga eskwelahan nga magreklamo bangod sa kakulangan sang supply sang tubig.
Ang mga ini ang may natalana naman nga water tank nga sarang magamit, kag gilayon nga magapatigayon sang water rationing kun makabatun sang request.
Samtang ang Bacolod City Health Office ang ginmanduan naman sa pagtsekyar sang food safety sa mga canteen kasubong man sang mga baligya sa gwa sang eskwelahan.
