Nagpaandam ang pinuno sang Environmental Sanitation Division sang Bacolod City Health Office sa kaso sang Pertussis.
Sa interview sang Bombo Radyo Bacolod kay Dr. Grace Tan, ang Pertussis ang tuga sang Bordetella Bacteria nga makalalaton sa tawo pamaagi sa droplets.
Suno diri, ini makalalaton ilabi na sa mga kabataan nga wala pa napabakunahan kag naga-edad sang lima ka tuig panaog kasubong man sa mga lapsag nga 0 to 2 months pa lamang kag sa mga nagabusong.
Apang, ini isa ka vaccine preventable disease amo nga nagapanawagan ini sa mga ginikanan nga pabakunahan ang mga kabataan.
Nagpanugyan man ini nga magsuksok sang facemask sa open places kag kun magkadto sa health facilities, ihaboy ang mga tissue nga nagamit na, magkaon sang maayo kag hatagan sang pahuway ang lawas.
Samtang, wala naman ginarekomenda ang self medication suno sa pinuno sang Environmental Sanitation Division sang City Health Office.
Ginkumpirmar naman sini nga wala sang confirmed case sang Pertussis sa ciudad sang Bacolod.
