Gin-athag sang Bacolod City Legal Office nga ginadumilian nga magbaton sang kwarta, regalo ukon commission ang mga empleyado sang City Hall.
Ini matapos nga maglapta ang impormasyon nga nagakuha sang commission ang mga traffic enforcers sang Bacolod City Traffic Authority Office (BTAO).
Suno kay Bacolod City legal officer Atty. Karol Joseph Chiu nga ginadumilian ang pagbaton sang komisyon, kag bisan ano man nga sahi sang regalo ang mga government employees.
Suno kay Chiu, bisan ano man ang status sang isa ka empleyado wala dapat nagabaton sang komisyon ukon regalo ang isa ka government employee.
Ini ang angut sa ginbuyagyag sang isa ka anay traffic enforcer sang ciudad nga sila ang gina-alegar nagabaton sang komisyon halin sa Metro Towing Service (MTS) sa kada may mapang-clamp kag ma-tow ang mga ini sang salakyan ukon motor.
Samtang, natalana naman nga paga-imbitahan ang Metro Towing Services (MTS)agud makahatag man ini sang statement natuhoy sa nasambit nga alegasyon kag imbitaron man ang pinuno kag deputy head sang BTAO kasubong man ang anay traffic enforcer agud nga mahibaluan ang kamatuoran.
Madumduman sang tinalikdan nga tuig may tatlo ka traffic enforcers nga wala na ginrenew ang kontrata kag ang mga ini ang nagpadangat sang reklamo sa city government kag nagpahayag nga sadto may ginabaton ang mga nga komisyon nagikan sa MTS ukon ang third party nga ginagamit sang ciudad para sa pagtow sang mga nagaillegal parking sa ciudad.
