Gin-athag sang konsehal kag abogado nga makabig gihapon nga balido ang kasal apisar nga indi lehitimo ang officiating priest kun sa tion sang kasal “in good faith”, isa ukon parehas nga couple ang nagapati nga ini ang may authority nga magkasal.
Madumduman nga nagpagwa sang statement ang Diocese of Bacolod nga nagapanginwala nga pari sang Roman Catholic Church ang nagapakilala nga Rev. Fr. Mario D. Divina sang Chaplaincy of the Holy Trinity sa Bago City.
May pila nga mga nagdangop sa Bombo Radyo Bacolod nga may kilala nga mga nakasal sang nasambitan nga pari, agud maklaruhan kun valid ang ginpatigayon nga kasal.
Sa interview sang Bombo Radyo Bacolod kay Bacolod City Councilor Atty Renecito Novero, santo sa Family Code, may-ara lamang sang mga ginhatagan sang otoridad nga magserbe nga solemnizing official sa kasal.
Kalakip diri ang mga pari, pastor, ministro, imams kag iban pa nga ginhatagan sang otoridad sang ila sekta ukon simbahan, provided nga sila ang rehistrado sa civil registrar general.
Kasubong man ang mga Judges, Mayor kag mga bise alkalde nga nagaserbe nga Acting Mayor sa ila mga banwa kag ciudad, kasubong man ang mga kapitan sang eroplano ukon barko para sa ila nga mga pasahero ukon crew.
Sa general rule, ang kasal nga ginsolemnize sang indi otorisado nga indibidwal ang makonsiderar nga null and void.// Apang bilang legal grace, may-ara sang exemption sa nasambitan nga layi.
Suno sa layi, kun ang isa ukon parehas nga couple ang wala nakahibalo nga peke kag nagapati nga matuod-tuod nga otorisado ang solemnizing officer, ang kasal ang kabigon nga legal.
Bisan pa may-ara sang magpetisyon nga ex’s ukon pamilya, kun mapamatud-an sang couple sa korte nga “in good faith” sila ang wala nakahibalo, balido gihapon ang kasal.
Apang kun may-ara sang pagpangduhaduha kag luyag gid nga makaseguro, ang mga nabiktima ang mahimo man makapatigayon sang 2nd marriage.
Samtang bisan sin-o ang sarang naman makapasaka sang kaso nga ussurpation of ecclessiastical authority bangod ini ang makabig nga public offense, kag ini ang sarang mapriso sang tinuig.
