Magapadayon sa pagpangalagad ang “Serbisyong May Puso” ni Bacolod City Lone District Congressman Greg Gasataya para sa mga pumuluyo sa ciudad sang Bacolod.
Sa State of the District Address (SODA), ginpahayag ni Gasataya nga sa sulod sang walo ka tuig nga pagserbisyo sa ciudad, iya gintutukan ang edukasyon, ikaayong lawas kag sports.
Kabahin sa ginreport ni Gasataya amo ang pagpasar sang ginduso nga hagna sa paghatag sang libre nga edukasyon sa mga State Universities and Colleges sa bug-os nga Pilipinas; pagfile sang hagna sa pagconvert sang Carlos Hilado Memorial State College (CHMSC) sa Carlos Hilado Memorial State University (CHMSU) kag pagfile sang hagna agud madugangan ang bed capacity sang Corazon Locsin Montelibano Memorial Regional Hospital (CLMMRH) bangud magutok sang una ang sitwasyon sang mga pasyente sa nasambit nga ospital apang sa karun nangin 1,000 bed capacity na ini kumparar sang una nga 600 lamang.
Nalakip man sa report ang paghatag sang katumanan sang handum sang mga pumuluyo nga may yara dapat sang kaugalingon nga hospital ang ciudad.
Ginreport man sang kongresista ang pagdihon sang Resolution 754 bangud kinahanglan nga iregulate ang importasyon sang HFCS ukon High-fructose corn syrup (HFCS) nga nagaapekto sa sugar industry sang pungsod.
Gin-anunsiyar man sang kongresista nga sa August 30, 2024 sarang na nga maagyan ang economic highway nga nagalaba sang 48.8 kilometers.
Nagpasalig si Gasataya nga ang iya dedikasyon sa pagpangalagad ang magapadayon kag iya man ginbilin ang tinaga nga “continue to watch me work.”
