Bukas ang alkalde sa ciudad sang Bacolod sa pagpain sang lugar sa tion nga may regional offices nga luyag itukod sa ciudad kadungan sang pagpasar sang Negros Island Region.
Una na nga nagpost sa social media si Bacolod City Mayor Alfredo “Albee” Benitez sa iya nga kalipay kag pagdayaw sa mga nagbulig sa pagduso sang hagna.
Suno diri, hululaton na lamang ang bicameral conference kag ini ang pagadal-on na kay President Ferdinand “Bongbong” Marcos Jr. para sa pirma.
Sa pahayag ni Bacolod City Mayor Alfredo “Albee” Benitez may mga regional office directors na nga nagapabutyag nga luyag nga iplastar ang opisina sa ciudad sang Bacolod.
Nagpasalig naman ini nga magapreparar ang duta nga sarang matukuran sang opisina.
Paathag sang alkalde nga mas maayo ang arrangement kag mas madasig mapalab-ot ang serbisyo ang mga departamento kun yari lamang sa ciudad.
Sa karun, padayun pa ang construction sang legislative building sang Bacolod City Government, samtang plano man nga patahumon kag palaparun ang Old City Hall, nga sarang mahamtangan sang mga opisina.
Ginapakamaayo man sang alkalde bangod mahapos nalang ang pagproseso sang mga papelis sa regional offices sa pagtukod sang NIR.
Magluwas sa mismo nga pagtukod sang talatapan, sarang man nga mabutang ang mga Regional Offices sa duha ka malls, kun sa diin nahamtang ang iban pa nga satellite offices sang Bacolod City Government.
Nagapati ang alkadle nga pinaagi sa modern technologies, mapadasig pa ang serbisyo sang mga ahensya sang gobyerno.
