Gin-athag sang alkalde sa syudad sang Bacolod nga indi political party ang ginadihon nila sa karun kundi isa ka movement kun sa diin siya ang isa sa nagabulig agud maporma ang grupo.
Sa interview sang Bombo Radyo Bacolod kay Bacolod City Mayor Alfredo “Albee” Benitez, gin-athag sini nga isa siya sa nagabulig kay President Ferdinand “Bongbong” Marcos Jr. agud nga mahimo ang isa ka movement nga ginatawag nga Kilusang Nagkakaisang Pilipino (KNP).
Suno kay Benitez, ginadihon sang mga ini ang movement bangud nagapati sila nga ang solusyon sa mga ginapangatubang nga problema sang tagsa ka siyudad kag banwa sa Pilipinas amo ang pagkakaisa ukon unity.
Suno sa alkalde ang mga miyembro sang movement ang ginalakipan sang mga public officials kag sector.
Ginpahayag man ni Benitez, nga ang grupo nga ginadihon nila sa karun ang lain man sa grupo sang bise presidente nga Hugpong ng Pagbabago, nga isa ka regional level nga political party.
Suno diri bukas ang grupo sa membership sang sin-o man nga nagapati nga ang solusyon sa problema amo ang unity, team work kag pagbinuligay, kag sila ang welcome nga mag-upod sa grupo kasunod sang nagwa nga report nga ginarecruit sang mga ini ang mga miyembro sang PDP-Laban.
Suno sa alkalde nagdangat naman sa ginatos ang nagpamiyembro sa grupo nga ginalakipan sang mga gikan sa sectoral group.
Suno kay Benitez, ang tinutuyo sang grupo ang alligned sa tinutuyo sang presidente nga unity.
