Ginalantaw sang alkalde sa ciudad sang Bacolod ang posibilidad sa pagbutang sang price ceiling sa rate sang kuryente.
Pahayag ni Bacolod City Mayor Alfredo “Albee” Benitez nga nagtawag na ini sa Department of Energy (DOE) agud mabal-an kun ano ang mga kondisyon nga makatrigger agud makadeklarar sang price ceiling ang Energy Regulatory Commission (ERC).
Paathag sang alkalde nga kaangay sang Department of Trade and Industry (DTI) nga sarang makadeklarar sang price freeze sa tion sang mga kalamidad kag iban pa nga sitwasyon, ang ERC ang may kaangay man nga gahom.
Nagalaom ang alkalde nga makapadala na sang sabat ang DOE subong nga semana may kaangtanan sa requirements.
Pahanumdom sini nga yara na sa kalamidad ang ciudad sang Bacolod bangod sa asod-asod nga mga brown out, apang tuman man ang pagtimbook sang electric bill.
Suno diri, mas maayo nga ang hingyo ang mapalab-ot man sa National Government kag ma-endorso nationwide.
Pahayag sini nga nagamahal ang bill bangod mahal ang kuha sang power supply sa wholesale electricity spot market (WESM).
Apang suno kay Benitez, nagapasaka sang presyo ang WESM bangod mataas ang demand, apang amo gihapon ang ila supply gani kaangay nga ginahingalitan lang nila ang karun nga sitwasyon.
Bangod sini panindugan sang alkalde nga dapat mahatagan sang price cap agud nga indi na ang mga ini makapasobra sa pagpasaka sang presyo.
