Nahisugtan sa session sang Sangguniang Panlungsod sang Bacolod nga isa na lang ka closed-door executive conference ang patigayunon kaupod sanday Bacolod City Police Office director P/Col. Henry Biñas kag Deputy City Director for Operations kag head sang City Drug Enforcement Unit P/Lt. Col. Jovie Espenido imbis nga sa session sang SP sila maga-atubang.
Nahibaluan nga sa gin-pasa nga resolusyon ni Councilor Jun Gamboa, luyag sini imbitaron sanday Biñas kag Espenido agud hambalan ang peace and order situation kag anti-drug campaign sang Bacolod.
Sa session kahapon sang SP, gin-propose ni Councilor Renecito Novero nga closed-door executive conference na lamang ang himuon antes ang session sa masunod nga semana bangud posible nga may yara sang mga sensitibo nga butang nga ma-istoryahan.
Plano man kuntani nga dal-on sa pagsinapol ang mga station commanders sang napulo ka police station sa ciudad apang nahisugtan man kahapon nga sanday Biñas kag Espenido lang.
