Ginkompirmar sang bise alkalde sang syudad sang Bacolod nga isa siya sa mapabakuna sa tion nga available na ang AstraZeneca COVID-19 vaccine.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga wala sang dapat nga kahadlukan sa pagpatublok sang Covid vaccine.
Suno kay Familiaran, wala sang dapat kulbaan sa vaccine bangud ginpaidalom ini sa maid-id nga pagtuon kag clinical trial.
Suno pa diri, ang mga tawo ang mas makulbaan sa coronavirus kag indi ang vaccine.
Gin-athag man sang bise alkalde nga indi man mandatory ang pagpabakuna sang COVID vaccine bangud may yara sang mga indi magpatublok bangud may mga allergies ini.
Suno kay Familiaran, dapat unahan sang mga nagakampanya para sa COVID vaccine ang pagpabakuna agud ang mga pumuluyo ang magasunod man.
Ginpahayag man sini nga may yara na sang P300 million nga ginpain ang syudad agud ibakal sang vaccine kag $5 ukon P250 per dose ang gin-aprubahan sang Sangguniang Panlungsod.
Suno pa diri nga magahatag lamang sang pondo ang syudad para sa vaccine kag itugyan na nila sa Department of Health ang pagbakal kag pagvaccinate.
