Nagapadayon ang pagtumod sang mga kapulisan sa Bacolod Police Station 7 sa mga suspek nga nagpuli kag napakal sang bato sa driver sang Handumanan-Libertad nga jeep kahapon.
Sa interview sang Bombo Radyo Bacolod kay Police Captain Dax Santillan, station commander sang Bacolod Police Station 7, sa iya nga pagpungko bilang station commander una pa lang ini nga kahigayunan nga may reported nga may natabo kaangay sang nasambit nga insidente.
Ang biktima ang ginkilala nga si Sebastian Tuazon.
Suno sa driver, nagreklamo ang isa ka pasahero nga siya ang wala nasensilyohan sa P100 nga ginplete, apang nanindugan ang driver nga lain ang nagapanukot sa terminal kag husto lamang ang ginremit sa iya.
Pagpanaog sang pasahero, may tatlo man nga pamatan-on nga nagpalapit, ginhampak sang balas ang driver, ginpulihan kag hana nga bun-on apang natapi sang driver ang kutsilyo, kag ginlapakan ni Bombo Mia Mae Francisco nga yara sa passenger seat agud indi na magamit.
Bangod wala na sang kutsilyo, ginhampak na lamang sang isa sa mga suspect sang bato ang driver, nga nagresulta sa samad sini sa bibig.
Pasalig ni Santillan nga pagabutangan sini sang police visibility ang lugar kag nagpanugyan nga indi magduha-duha ang driver sa pagpangayo sang bulig kun kinahanglan bangud sila ang magaresponde man gilayon.
Ang mga suspek nga ginapahayag mga pamatan-on ang mahimo mapasakaan sang kaso nga may kaangtanan sa physical injuries.
Nagpanawagan man ini sa mga suspek nga magsungka na agud nga mabatian man ang ila nga bahin.
