BACOLOD CITY-Matapos ang masobra tunga sa adlaw nga tensyon kag pagsuspender sang mga byahe sang Ceres buses nga padulong sa Southern Negros Occidental kag iban nga parte sang Negros Oriental kaina, nagtawhay na ang south terminal sa Lopez Jaena St. ciudad sang Bacolod.
Nahibaluan nga alas-3:00 pa lang kaina sang kaagahon sang nagsugod ang tensyon sa Ceres south terminal sang nagsulod ang AGNSA Security Agency matapos nga nagbiya kahapon sang hapon ang AY-76 Security Specialist Inc. nga ginbutang sang elected president sang Yanson Group of Bus Companies nga si Roy Yanson.
Madumduman nga mismo ang PNP Supervisory Office for Security & Investigation Agencies (PNP-SOSIA) ang nag-implementar sang order nga iinstall liwat ang AGNSA Security Agency nga amo ang nagaguwardiya sa terminal sa tion anay sang ousted president nga si Leo Rey Yanson (LRY), bulos sa AY-76 Security Specialist Inc kahapon.
Apang matapos nga nakasulod ang AGNSA sa terminal kaina sang kaagahon, nagpadulong sa lugar si Roy kag ang iya utod nga si Ma. Celina Yanson Lopez nga amo ang nagmando sang suspension sang byahe sang mga units.
Bangud sini bilog nga adlaw nga naparalisar ang byahe sang mga bus nga padulong sa southern Negros Occidental kag iban nga bahin sang Negros Oriental.
Apang matapos nga nagbiya ang mag-utod nga Roy kag Celina sa teminal mga alas-5:30 sini nga hapon, ginsulod na ini sang kampo ni Leo Rey nga ginkumpirmar mismo ni Jade Seballos, media relations officer sang Vallacar Transit Incorporated.
Matapos ang tensyon bilog nga adlaw, ginpahayag ni Seballos nga nagapangyo gid sang pasaylo ang Yanson matriarch nga si Olivia Villaflores Yanson kag si LRY sa mga pasahero nga naapektuhan sang suspensyon sang byahe.
Bangud sini, malipayon nga gin-anunsyar ni Seballos nga bilang konswelo sa mga pasahero nga apektado, magabalik na ang byahe sang Ceres bus sumugod alas-12:00 sini nga kaagahon kag mangin 100 porsyento nga libre ang plete tubtob alas-12:00 bwas sa udto.
Samtang 50 porsyento naman ang discount sa plete sumugod alas-12:00 bwas sa udto tubtob alas-12:00 sang kaagahon.
