Dako ang pagpasalamat sang Bacolodnon nga si Coast Guard Captain Christine Pauline Diciano matapos nga ini ang ginkilala bilang labing una nga Female Commander sa Philippine Coast Guard (PCG) Aviation Force.
Suno kay Diciano, siya ang 21 ka tuig na sa serbisyo kun sa diin siya ang kabahin sa labing una nga female recruit sang PCG sang 2001.
Ginakalipay man sini nga ang mga babayi nga coast guard ang nagabatun na sang indi tradisyunal nga mga papel sa bahin sang maritime search and rescue, maritime law enforcement, marine environmental protection, maritime safety kag maritime security.
Pahayag ni Diciano nga 25 porsyento sang kabug-usan nga pwersa sang PCG ang mga babayi.
Ang iloy sini ang isa ka nurse, apang nagtaliwan na tinalikdan nga tuig bangod sa cancer samtang ang amay sini ang anay katapo man sang PCG.
Sa pihak nga bahin antes paman ginhatag sa iya ang pasidungog, 12 anyos palang sang nabugtaw si Diciano sa responsibilidad nga makabulig sa pamilya, gani nagkuha ini sang scholarship sang siya ang highschool pinaagi sa academic kag performing arts sa La Consolacion College (LCC).
Ini ang nakatapos sa high school nga salutatorian.
Samtang sa kolehiyo sang siya ang nagtuon sang Computer Science sa University of Saint La Salle (USLS) – Bacolod, siya ang nangin performing arts scholar, student aide kag working student.
Siya ang nagakanta man sa mga kasal ukon public events kun sa diin ang talent fee nga ginagamit sini sa pag-eskwela kag nagpasakop man ini sa Dance Company sang buluthuan magluwas pa sa responsibilidad sini bilang Sangguniang Kabataan official sa Barangay Sum-ag, Bacolod City.
Matapos makagradwar, pito ka bulan man ini nga nagtudlo sa International linkage sang USLS – Bacolod tubtob sa nakabatun ini sang offer nga mag-eskwela sa PCG course.
Suno kay Diciano nakabatun ini sadto sang scholarship nga mag-eskwela sa Philippine Military Academy (PMA) antes paman magkuha sang Computer Science apang wala ini madayun bangod wala ginpahanugutan sang iya nga iloy.
Samtang paathag sini nga gin-imbetaran lang ini sadto nga mangin muse sa programa sang PCG nga amo man ang nangin labing una nga female recruitment.
Pahayag sini nga bangod yara man sa PCG ang iya amay, sadto paman idolo nya na ini gani wala ini nagduhaduha nga magsulod sa kaangay nga public service.
Antes paman ini nangin 1st Woman Commander sa PCG Aviation Force, siya ang nakalibot na sa madamo nga mga posisyon sa ahensya.
Samtang nakilala naman sini ang bana mismo sa ahensya bangod ini ang katapo man sang PCG.
Nagabusong naman ini sa subang nagapaidalum sa co-pilot training kag nagabusong sa ikaduha sang yara sa pilot training.
Siya ang nangin first female pilot sa Philippine Coast Guard, samtang gintinguhaan naman sini nga majuggle ang pamilya kag ang aerial operation tubtob sa karun siya ang napromote na bilang Commander sa Aviation Force sang Philippine Coast Guard.
