Bag-o nga Supreme leader sang Iran nga si Mojtaba Khamenei, nasamaran sa nagapadayun nga gyera

Ginkumpirmar sang Iranian State television nga ang bag-o nga gin-anunsyar nga Supreme Leader sang Iran nga si Mojtaba Khamenei ang gina-alegar “wounded” ukon nasamaran sa nagapadayon nga gyera sa pungsod.

Suno sa report, gintawag bilang “janbaz” si Mojtaba nga nagatuhoy sa isa ka tawo nga nasamaran sang kontra sa ila ginatawag nga “Ramadan war”.

Samtang, wala na naghatag sang dugang pa nga detalye ang state media natuhoy sa kahimtangan sini.

Ang pagpakilala kay Mojtaba ang natabo matapos matapay ang iya nga amay kag anay supreme leader Ayatollah Ali Khamenei, pati ang asawa sini sa isa ka joint military operation sang U.S. kag Israeli sa Tehran sang nakaligad nga Pebrero 28 nga amo ang ginhalinan sang gyera.

Humalin sang nag-umpisa ang gyera, wala pa nagpakita sa publiko si Mojtaba.

Nahibaluan nga si Mojtaba ang ginapatihan nga maayo sa linggwahe nga Ingles kag nakatapos sang mga specialized courses sa psychology kag psychoanalysis.

Ginlaragway man siya bilang may yara sang kaalam sa moderno nga teknolohiya, military sciences, security affairs, pati sa mga prinsipyo nga pampulitika kag mga kinahanglanon nga abilidad agud mapamunuan ang Iran.

Madugay na nga kilala si Mojtaba bilang maimpluwensya nga tawo apang hipos lamang ini sa sulod sang political kag security establishment sang Iran.

Sa sulod sang pila ka dekada, nagpabilin ini sa likod sang mga importante nga desisyon sang iya amay samtang ginapabaskog ang iya koneksyon sa mga nagapanguna nga institusyon sang Islamic Republic.

Sa karon, wala pa sang mga na-report kun ano ang masunod nga tikang sang bag-o nga Supreme Leader sang Iran.