Nagbalik sa sulod sang Philippine Area of Responsibility ang Bagyo BISING nga may international name nga DANAS alas-11:00 kagab-i kag ini ang nagsanyog na sa Typhoon category.
Alas-4:00 kaina sang kaagahon, ang Typhoon BISING ang ulihi nga nasiplatan sa 405 km North Northwest sang Itbayat, Batanes.
Dala sini ang kabaskugon sang hangin nga nagadangat sa 130 km/h kag pagmadlos nga tubtob 180 km/h.
Ang Bagyo ang nagahulag sa Northeastward nga dereksyon sa kadasigon nga 25 km/h.
Apisar nga yara na liwat sa sulod sang PAR, ang Typhoon BISING ang malayo sa kadutaan gani ini ang wala na sang derekta nga epekto sa diin man nga bahin sang pungsod.
Wala naman sang gindagdag nga Tropical Cyclone Wind Signals, kag ini ang indi naman makatuga sang makusog nga pag-ulan.
Apang sa pihak sini, ang padayun nga epekto sang Southwest Monsoon ukon Hangin Habagat amo ang magatuga sang maulanon nga panahon sa dako nga bahin sang pungsod.
Makabatyag sang mataas nga tyansa sang mga pag-ulan sa dako nga bahin sang Luzon, nakatungdan nga bahin sang Visayas kalakip na sa atun sa Negros Island Region kasubong man sa nakatungdan nga bahin sang Mindanao.
Samtang mangin makanay naman ang panahon sa Bicol Region, Central kag Eastern section sang Visayas kasubong man sang Mindanao, apang lauman gihapon ang posibilidad sang gulpyada kag makadali nga mga pag-ulan tuga sang Localized Thunderstorms.
