Nagsanyog na sa Tropical Storm category ang Bagyo NANDO alas-11:00 kagab-i, samtang kahapon sang aga, nakagwa naman sa Philippine Area of Responsibility ang Bagyo MIRASOL nga ginhatagan na sang international name nga Tropical Storm MITAG.
Alas-4:00 kaina sang kaagahon, ulihi nga nasiplatan ang Tropical Storm NANDO sa 1,075 km sa nasidlangan sang Central Luzon.
Dala sini ang kabaskugon sang hangin nga nagadangat sa 75 km/h kag pagmadlos nga tubtob 90 km/h.
Ang Bagyo ang medyo nagbaskog pa samtang nagahulag padulong sa West Northwestward nga dereksyon sa kadasigon nga 15 km/h.
Wala naman sang mga lugar nga napaidalom sa Tropical Cyclone Wind Signal.
Lauman nga pasanyugon pa sang Tropical Storm NANDO ang Southwest Monsoon ukon Hangin Habagat, nga makatuga sang madamol nga mga pag-ulan kag makaeksperyensya sang makusog nga huyop sang hangin partikular na sa mga nabukid nga mga lugar subong man ang mga malapit sa kadagatan.
Apektado sang ginpabaskog nga Habagat ang Ilocos Region, Zambales, Bataan, Bicol Region, kag Eastern Visayas.
Sa pihak nga bahin, ang anay Bagyo MIRASOL nga ginhitagan na sang International Name nga MITAG ang nagbaskog man sa Tropical Storm category.
Ini ang ulihi nga nasiplatan sa 545 km West Northwest sang Itbayat, Batanes.
Dala sini ang kabaskugon sang hangin nga nagadangat sa 75 km/h kag pagmadlos nga tubtob 90 km/h, nga nagahulag padulong sa naaminhan nga dereksyon sa kadasigon nga 20 km/h.
Santo sa track kag intensity forecast, ginalantaw nga padayun nga magahulag sa west northwestward nga dereksyon ang Bagyo NANDO samtang yara sa Philippine Sea sa masunod nga 24 oras.
Ini ang mahimo nga magloop ukon magatiyog pa antes magliko sa northwestward tubtob west northwestward nga dereksyon karun sa gab-i tubtob bwas sa kaagahon.
Samtang ini ang sunod nga magahulag na sa nakatungdan nga dereksyon samtang nagahilapit sa Extreme Northern Luzon.
Malauman ang pagtupa sang mas mabaskog nga mga pag-ulan bangod sa Bagyo NANDO kag Habagat sa Domingo tubtob sa Lunes.
Ginalantaw nga ang sentro sang Bagyo ang magalabay malapit ukon magalandfall gid mismo sa Babuyan Islands sa Lunes sa gab-i, Setyembre 22 tubtob Martes sang aga,, Setyembre 23.
Samtang ini ang mahimo nga makagwa naman sa PAR sa Martes sang hapon ukon sa gab-i.
Lauman nga padayun pa nga magabaskog ang Bagyo NANDO samtang yara sa Philippine Sea kag mahimo magdangat sa Typhoon category bwas sa gab-i.
Wala naman ginadula ang posibilidad nga magabaskog pa sa super typhoon category ang Bagyo sa pagtabok sa Extreme Northern Luzon.
