Masobra P17 million ang balor sang halit sa mga pananum kag pangisda nga gintuga sang pagbaha sa Northern Negros sang tinalikdan nga Enero 1.
Sa interview sang Bombo Radyo kay Office of the Provincial Agriculturist Head Atty. Japhet Masculino, kabug-usan nga P17,007,488 ang balor sang halit nga natuga sang pagbaha sa mga pananum nga pangisda sa mga ciudad sang Victorias, Silay, Talisay, Sagay, Cadiz kag EB Magalona.
Suno kay Masculino, masobra P11 million ang kabug-usan ga halit nga natuga sa mga humayan, P2,647,000 sa mga high value crop samtang P4,610,000 naman sa mga fisheries.
Suno sa iya, P5.2 million ang balor sang halit nga ginsubmit sang Victorias City sa mga humay kag pananom; P52,575 sa Sagay City; kapin P302,000 sa Cadiz; P4.2 million sa EB Magalona; P1.6 million sa Silay kag P1,500 sa ciudad sang Talisay.
Samtang sa high value crops naman, nagdangat sa P840,600 ang halit nga natuga sa Silay City kag P1.8 million sa Victorias City.
Kabug-usan nga 1,494 ka hektarya sang duta ang naapektuhan kag 3,070 ka mga mangunguma kag manugpangisda.
Suno kay Masculino, madamo man ang nakapa-insured ang humay bangud libre ang insurance diri basta makig-angot lang sila sa city ukon municipal agriculturist.
Preparado naman suno sa iya ang Philippine Rice Research Institute kag Department of Agriculture agud magpanagtag sang binhi nga ayuda.
