Gina-usisa sang Bacolod City Government ang Department of Public Works and Highways sa rasun sa natukiban nga wala nabuksan nga outfall sa Bacolod Diversion Channel nga naresulta sang pagbaha sa SM City Bacolod, Palanca Road, Pope John Paul II Tower, Bacolod City Public Plaza, tubtob sa Bacolod Downtown Area sang nakaligad nga inadlaw.
Sa interview sang Bombo Radyo Bacolod kay Bacolod City Administrator Atty Mark Steven Mayo, natingala ang mga ini sa pagsaka sang tubig baha sa area, samtang ang mga lugar nga masami gid nga ginabaha kun magdamol ang ulan ang wala nakarecord sang pagbaha, kaangay sang Prk Carvic, Brgy Mandalagan kag dalan Lacson.
Dugang pa nga natapos na ang bag-o nga drainage system sa Bacolod Public Plaza gani katingalahan kun ngaa may nagluntad nga pagbaha.
Sa pagtsekyar sang City Engineer’s Office, nakita nga sarado ang pila ka outfall nga nagakonekta sang mga drainages sa diversion channel.
Gilayon ginmando ni Bacolod City Mayor Greg Gasataya nga manual na nga buksan ang outfall, kag nakita nga madasig man nga nagsubside ang tubig-baha.
Suno kay Mayo, dapat may-ara sang built-in mechanism nga automatic nga magasarado sang diversion channel kun hightide agud indi makasulod ang tubig baha, samtang automatic man nga magabukas ang outfall gikan sa mga drainage, agud wala sang matabo nga pagbaha.
Suno kay Mayo, kinahanglan ang sabat sang DPWH sa issue ilabi na nga sila ang mas nakahibalo sa mga teknikal nga aspeto sa issue.
Ginklaro man sang DPWH- Bacolod City nga manual pa ang pagbukas sang outfall sa Bacolod Divertion Channel, kag ang proyekto ang wala pa maturn-over sa ila talatapan sang DPWH Region 6.
Sa interview sang Bombo Radyo Bacolod kay Engr Leah Jamero, District Engineer sang DPWH-Bacolod, manual ang ginbutang nga sluice gate, kag yara pa lamang sa 1st phase ang Divertion Channel.
Ini ang proyekto sa idalom sang DPWH Region 6, kag ang DPWH Bacolod lamang ang nagaserbe nga overseer.
Paathag sini nga nagrequest naman sila nga maturn-over na sa DPWH Bacolod ang proyekto, apang suno sa project engineer wala pa natapos bayaran sang DPWH Region 6 ang proyekto.
Wala man nakahibalo si Jamero nga naserado ang outfall, apang sang nahibaluan sini ang pagbaha, gilayon man niya nga gincontact ang project engineer agud magsulod ang tubig gikan sa mga drainage system sa diversion channel.
Apang nauna lamang sa pag-abot ang mga personnel sang Bacolod City Engineer’s Office, nga napilitan magtaklas sa fence agud mabuksan ang outfall.
Suno kay Jamero, nagrequest naman ang ciudad nga buksan nalang gid sang unay ang diversion channel.
Ang imprastraktura ang nadesinyo naman kun sa diin maga-agwasa ang tubig padulong sa dagat, apang apisar magta-ob indi magsulod ang tubig-dagat sa diversion channel.
Suno kay Jamero, ang diversion channel ang butangan pa sang pumping station agud nga bisan magtaob kag sarado ang sluice gate, sarang gihapon mabomba pagwa ang tubig.
