Nagalaom ang mga manugbaligya sa Bacolod Vendors Plaza nga mapangitaan sang city government sang paagi nga magadamo ang bumalakal sa merkado agud nga indi sila mamierdihan.
Sa pagbisita sang Bombo Radyo Bacolod sa Vendors Plaza, palareho ang reklamo sang mga manugbaligya nga wala sila sang income bangud tuman kaiwat ang baklanay.
Suno kay Rosinie Biñas sang Barangay 35, Bacolod City kag nagabaligya sang panakot sa pagluto, may mga inadlaw nga 20 pesos lamang ang iya benta halin sa aga tubtub maggab-i gani sigurado nga sila ang magutuman.
Bangud wala sang nagabakal suno kay Biñas, nagakadunot lang ang ila baligya kag indi mabawian ang ila kapital.
Sa subong, wala pa man sila sang numero agud mahibaluan kun sa diin sila magapwesto.
Si Biñas ang nagabaligya sadto sa dalan Luzuriaga kag ginsaylo sila sa Vendors Plaza sang Agusto 31.
Suno naman kay Elena Natenga sang Barangay Estefania nga nagabaligya sang prutas sa amo nga merkdo, masobra lamang 100 pesos ang pinakatayog nga iya mabenta sa sulod sang isa ka adlaw bangud diutay lamang ang nagasulod sa Vendors Plaza kag nagabakal.
Sa pagkamatuod suno sa iya, nagbiya na diri ang iban nga mga vendors nga halin man sa downtown kag Gonzaga bangud wala man sila sang income.
Suhestiyon sini sa city government, butangan sang ruta sang jeep nga magalabay sa Vendors Plaza agud bisan paano, may mabakal man sang ila baligya.
