Gina-alegar nga ginsulod kag ginkawatan ang isa ka balaligya-an sang cellphone sa Barangay 1, Sipalay City sang Huwebes, Oktubre 13 sang gab-i.
Ginkilala ang biktima kay Reynaldo Eusebio kag nagapanag-iya sang Galleon Enterprises.
Santo sa police report sa syudad sang Sipalay, nagpadulong sa ila estasyon ang biktima agud i-report nga ginkawatan ang iya balaligyaan paagi sa pag-guba sang pwertahan sa likod nga bahin sang establishimento.
Santo sa pahayag sang biktima, nadiskubrehan na lamang nga nadula na ang mga cellphones kag iban pa nga gadgets sa store.
Sa imbestigasyon sang pulis, ginpahayag sang isa ka witness nga sang amo nga gab-i may nakita ini nga tawo nga nag-gwa sa store bitbit ang karton nga puno sang cellphones apang gindumdom sini nga empleyado sang shop.
Nahibaluan nga wala sang nagabantay nga gwardiya sa shop sang natabo ang gina-aligar nga pagpangawat.
-photo from web
