Makaduha ka beses nga nasunog ang isa ka balay sa Purok Cheriza South, Brgy 3, Bacolod City sa sulod sang isa lamang ka semana.
Sa interview sang Bombo Radyo Bacolod kay Fire Inspector Jemarie Tapiru, deputy fire marshal sang Bacolod City Fire Station, ang balay ang ginapanag-iyahan ni alyas Alfredo, 62 anyos, kag parehas nga ini lamang ang yara sa balay sang natabo ang mga sunog.
Kaina pasado alas-8:00 sang aga, may nagluntad nga bush fire sa balay ni Alfredo bangod sa napabay-an nga tinig-ang.
Kaangay man ang natabo sang Hunyo 16 kun sa diin nasunog gid ang balay.
Parehas man nga napalong ang sunog paagi sa pagbuligay sang mga pumuluyo.
Suno kay Tapiru, sa una nga insidente nga natabo alas-4:30 sang kaagahon, pahayag ni Alfredo nga nabiyaan sini ang tinig-ang kag siya ang nagkadto sa iya nga bata.
Samtang kaina, matapos magtig-ang ang senior citizen ang nagbiya man sa balay kag magkaon sa karinderia.
Wala naman nasunog ang balay sa ikaduha nga kahigayunan, sa baylo ang mga hilamon sa palibot sang kalan amo ang nasunog.
