Nakuha sang isa pamilya sa Germany ang world record bangud sa kadamuon sang ila Christmas trees nga nakalab-ot na sa mga banyo sang ila nga balay.
Ang Christmas trees ang makita sa balay sang pamilya nanday Thomas kag Susanne Jeromin sa Rinteln sa Lower Saxony sa Germany.
Nagdangat sa 605 ka mga decorated plastic Christmas trees ang yara sa ila balay.
Gingamitan ini sang 120,000 Christmas baubles, 50,000 lights kag linibo ka Christmas figures.
Ginsuguran sang Hunyo ang ila pagdekorar kag lain-lain pa ang theme sa kada kahoy — may ara nga “Star Wars” kag may ara naman nga “The Simpsons” kag iban pa.
Suno sa mag-asawa, passion gid sang bana ang paghimo sini gani nga nadalahig pati ang bathroom… apang ang isahanon nga off-limits amo ang kuwarto sang ila bata nga babayi.
Ini na ang ika-anum nga tuig nga ginhatag sa ila ang world record sang most decorated Christmas trees sa isa lamang ka lugar. Ginhatag man ini sang Record Institute for Germany sa ila pamilya sang 2017 tubtub sang 2021 kag sang 2023.
