Dakop ang isa ka babayi samtang nakapalagyo ang kaupod sini nga lalaki matapos mangawat sang kapin P500,000 nga balor sang alahas sang manugbaligya sang uga sa Cadiz City Public Market, Barangay Zone 3, Cadiz City, Negros Occidental, kahapon alas- 11:00 sang udto.
Ang biktima ang ginkilala nga si Jesellee Lobaton, 40 anyos, kasado, dried fish vendor kag residente sang Purok Bougainvillea, Barangay Banquerohan, Cadiz City, Negros Occidental kag ang nadakpan naman nga suspek amo si Jannet Limpisdo, 46 anyos, wala sang trabaho kag residente sang Tagumpay Street, Tondo, Manila samtang ang isa sini ka kaupod ang wala makilal-an.
Sa interview sang Bombo Radyo kay PLt Mansueto De Jose Jr, deputy chief of police sang Cadiz City Police Station, nagbakal si Limpisdo kaupod ang isa ka lalaki nga suspek sang uga kay Lobaton nga nagabalor sang P50 apang sinsilyohon ang ila kwarta amo nga madugay ang bayranay.
Suno diri, samtang nagabayad si Limpisdo, ang kaupod nga lalaki nagsulod sa stall ni Lobaton kag ginkuha ang iya bag nga itom nga naga-unod sang alahas nga nagabalor sang kapin P500,000 kag cash nga kapin P3,000.
Nakita sang bana ni Lobaton nga nagsulod ang lalaki kag namangkot ini kun kilala niya ang tawo.
Didto na kag nahibaloan ang plano sang duha nga mangawat kag natigayon nga nadakpan si Limpisdo samtang nakapalagyo naman ang lalaki nga suspek.
Nagpakuno-kuno pa si Limpisdo nga apa apang sang ulihi nag-ako ini nga involved siya sa insidente sang pagpangawat.
Pahayag ni De Jose, ginafollow up pa agud marekober ang nakawat nga bag sang biktima.
Gin-ako sang suspek nga si Jannet Limpisdo nga tuyo gid man nila sang iya mga kaupod nga kawatan nga mangsalisi sa Cadiz City, apang suno diri naghaum ini nga mga bayo kag mga gamit ang ila kawaton.
Sa interview sang Bombo Radyo kay Limpisdo nga residente sang Tondo, Manila, may tatlo ini ka kaupod nga nakilala lamang niya bilang alyas Linda, Baby, kag Rubilyn.
Suno diri, ginsugo lamang siya sang iya mga kaupod nga magbakal sang uga samtang may kwaon naman sila.
Suno pa diri, nakibot ini sang makita nga ginkuha sang iya upod nga lalaki ang bag sang dried fish vendor nga si Jesellee Lobaton sang Purok Bougainvillea, Barangay Banquerohan, Cadiz City.
Ang bag ang may unod nga mga alahas nga nagadangat sa balor nga P500,000 kag P3,000 nga cash.
Suno kay Limpisdo, indi na sini macontact ang tatlo niya ka kaupod bangod ginblock na nila ang iya cellphone number apang nagapanawagan ini sa ila nga ibalik kun tani ang bag ni Lobaton.
Ginpahayag man sini nga nagakinahanglan lamang siya sang kwarta para sa anum niya ka bata kun sa diin ang pinamanghod naga-edad sang 14 anyos samtang ang pinakamagulang naman naga-edad sang 30 anyos kag may ginasuprer nga sakit.
Samtang, dugang pa sini may kaso man siya sadto sa Pampangga kag Cebu kun sa diin nakabayad ini sang pyansa.
Aminado si Limpisdo nga plano gid man nila mangsalisi sa Cadiz City apang wala siya sang ihibalo nga tuyo sang mga upod niya mangawat sang kwarta.
