Balor sang piso batok sa dolyar, naghuyang sa P60.300 per US$1

Mas naghuyang pa gid ang balor sang piso sa pagsirado sang trading kahapon, Marso 23, matapos nga na-record ang foreign exchange rate sa P60.300 kada US dollar.

Ini na ang pinakamanubo nga balor ukon all-time low sang piso sa maragtas sang foreign exchange.

Mas manubo ini kumpara sa P60.10 sang nakaligad nga Huwebes, Marso 19.

Suno sa mga analyst, padayon nga apektado ang piso sang mga external factors kaangay sang pagsaka sang presyo sang produktong petrolyo kag kinagamo sa Middle East.

Ginalauman nga mangin kritikal ang mga masunod nga semana para sa Bangko Sentral ng Pilipinas sa pagpatuman sang mga tikang agud pabaskugon ang piso batok sa dolyar.