Padayon nga ginadapatan sang pagbulong ang nasamaran nga persona matapos nga magmaoy kag nanaya sang armas-luthang sa nagresponde nga katapo sang Charlie Company, 62nd Infantry Battalion, Philippine Army sa Barangay Macagahay, Moises Padilla, Negros Occidental sang Marso 23, sang gab-i.
Santo sa report, nagtawag sa Moises Padilla Municipal Police Station si Renato Espanola, 52 anyos, kag isa ka Kagawad sang Barangay Macagahay, Moises Padilla agud nga magpahibalo nga ay isa ka persona nga nagamaoy sa nasambit lugar.
Gilayon man nga nagresponde ang mga kapulisan sa nasambit nga lugar.
Sa imbestigasyon, antes ang insidente nagahimo sang gamo ang suspek nga gilayon man nga ginrespondehan sang mga Barangay Tanod kag personnel sang Charlie Company, 62nd Infantry Battalion, Philippine Army nga nagapatigayon sang Mobile Community Support Sustainment Program sa nasambit nga lugar kag gintuyo nga pakalmahon ang suspetsado nga nagauyat sang patalom kag short firearm.
Apang sa baylo nga magpakalma kag magsunod, gintaya sang suspek nga ginkilala kay alyas Rey Ann ang iya pusil sa nagresponde nga grupo rason nga ginluthang ni PFC Junvy G. Gardose ang suspetsado, naigo ini sa natuo nga paa kag natigayon ini nga ma-control.
Ginturn-over sang mga personnel sang 62nd IB sa responding unit sang istasyon ang bladed weapon kag pusil sang suspek.
Gilayon naman nga gindala sa Municipal Health Infirmary sang Moises Padilla ang suspek sang mga rescue personnel sang MDRRMO sang nasambit nga munisipyo para sa medical treatment kag sang ulihi ginsaylo sa Kabankalan City Hospital.
