BACOLOD CITY-Nag-isyu si Bacolod City Mayor Evelio “Bing” Leonardia sang Executive Order No. 12 nga nagapahanugot sa mga barko nagikan sa China, Hong Kong kag Macau nga magdungka sa mga pantalan sa Bacolod.
Nahibaluan nga ang EO No. 12 ang naga-modify sang EO No. 11 nga una ginpapanaog sang alkalde nga nagadumili sa mga foreign cargo vessels nagikan sa nasambit nga mga pungsod.
Ang EO No. 12 ang gin-isyu sang alkalde kasunod sang sulat nga ginpadala ni Department of the Interior and Local Government (DILG) Secretary Eduardo Año nga dapat sundon ang mga protocol kag guidelines nga ginpagwa sang Department of Health.
Apang, gin-athag man sang tiglikom nga ginadayaw niya ang tikang nga ginhimo sang ciudad batok sa coronavirus disease 2019 (COVID-19).
Nakasaad sa bag-o nga executive order nga indi pwede makapanaog ang mga crew sa barko magluwas lamang sa mga otorisado nga personnel apang dapat may yara sila sang quarantine clearance kag nakasuksok sang Personal Protective Equipment (PPE).
