Nag-file sang reklamo si Atty. Manases “Mans” Carpio, bana ni Vice President Sara Duterte, batok sa pila ka mga miyembro sang House justice committee bangud sa ginaalegar paglapas sa pila ka layi may kaangtanan sa pagbukas sang bank transaction records sini kag sang bise presidente.
Paagi sa iya mga legal representative, nag-file si Carpio sang supplemental complaint sa Quezon City Prosecutors Office nga naga-akusar sang paglapas sa Anti-Money Laundering Law, Bank Secrecy Law, kag Data Privacy Act of 2012.
Una na nga nagpasaka sang reklamo si Carpio batok sanday House Justice Committee Chairperson Gerville Luistro sang Batangas, House Senior Deputy Minority Leader Leila de Lima sang ML party-list, kag House Assistant Minority Leader Chel Diokno sang Akbayan party-list bangud sa kapareho nga gina-alegar nga paglapas.
Nahibaluan lamang sang publiko ang natuhoy sa supplemental complaint sang Biyernes, Hulyo 31, matapos ginsumiter sang mga respondents ang ila counter-affidavits bilang sabat sa reklamo.
