Napuno sang mga Bacolodnon ang Central District Football Field sa Brgy. Mandalagan, ciudad sang Bacolod kagab-i sa ginpatigayon nga Mayor’s Night Sunset Festival 2 kun sa diin ang highlights amu ang mga banda nga Itchyworms kag Rivermaya.
Antes ini, nagperform man ang pila ka mga local bands kag musicians nga ginalakipan sang MC NYKZ, Manic, DJ Van, Flex D, Johpong, Couchlock 034, Paradox BCD, Doughbaby, Ardent Solstice, Mondae Cleaners, Yuya, Gaspar and the Waiters kag Infinite Ridge.
Pag-abot sa highlights, naghinugyaw ang crowd nga lunsay nakasuksok sang puti sang nagperform na ang The Itchyworms nga gintukar ang ila kilala nga mga kanta kaangay sang Di Na Muli, Ayokong Tumanda kag Akin Ka Na Lang.
Samtang, may fireworks display naman nga ginpatigayon antes nagtukar ang Rivermaya sang ila hit songs nga Elesi, 214, Himala, Kisapmata kag You’ll Be Safe Here.
Ang Sunset Festival 2 ang nagsugod alas 4:00 sang hapon kag natapos pasado alas 12:00 sang kaagahon.
Samtang, sa initial nga assessment sang mga otoridad, nangin matawhay naman ang ginpatigayon nga event kag wala sang may nagluntad nga untoward incidents sa area.
Nakastandby man ang mga kapulisan kag mga personnel sang Disaster Risk Reduction and Managemet Office.
Antes ini nagpagwa na sang abiso ang local government unit sang ciudad sang Bacolod nga posible makaangkon sang problema sa trapiko sa Lacson Street padulong sa area sang konsyerto.
