Napauli na sa England ang bangkay sang former One Direction member nga si Liam Payne sang Lunes, Nobyembre 4, 2024.
Madumduman nga napatay si Liam matapos mahulog nagikan sa balkonahe sang CasaSur Hotel, sa Buenos Aires, Argentina, sang Oktubre 16, 2024.
Nadugayan sa Buenos Aires ang bangkay ni Liam bangud ginpaidalom ini sa maidid nga autopsy kag padayon nga imbestigasyon sang Public Prosecutor’s Office sang Argentina agud matumod ang kabangdanan sang kamatayon sang sikat nga British singer.
Dako nga balita sa bug-os nga kalibutan ang pagtaliwan ni Liam bangud sa kun paano ini napatay kag sa mga estorya angot sa natabo antes pa man ini nahulog nagikan sa balkonahe sang hotel nga gintiniran sini sa Buenos Aires.
Sang nakaligad nga semana, ginwaragwag sang isa ka Argentinian broad journalist nga aksidente ang pagkadagdad ni Liam nagikan sa balkonahe sang hotel bangud antes paman sang aksidente nadulaan sang pangalibutan ang 31-year-old singer.
Ginkumpirma man sini nga nakuhaan sang CCTV ang natabo apang wala ginpagwa ang kontrobersiyal nga footage nga makapamatuod nga aksidente kag wala naglumpat si Liam.
