Ginkakibot sang mga tawo nga nagbukas sang pantyon sang isa ka suldado nga masobra apat ka dekada na nga napatay sa Pagadian City, Zamboanga del Sur ang nakita ila sa sulod sang pantyon.
Nahibaluan nga si Bobby ang ginluthang kag napatay sang 1985.
Samtang nabilin naman nga nagpangabuhi ang iya asawa nga si Victoria kag apat nila nga bata kalakip na si Vicky nga ginabusong pa lang sadto kag wala nakita ang iya amay.
Sang Marso, nagtaliwan ang iloy nila nga si Victoria bangod sa cancer kag plano nga isahon na lang ang pantyon sang ila amay kag iloy.
Isa sa naghukay si Joel Ybanez nga nagbakal sang karton kag plastic sa pagpati nga kalansay na lamang ang ila makita sa sulod sang pantyon.
Apang sang ginbuksan nila ang lungon ni Bobby, ila ginkakibot nga wala nadunot ang iya bangkay halin sa ulo tubtob sa sapatos sini bisan ang iya ginasuksok nga uniporme.
Kag wala man sang baho ang bangkay bisan nakahulom sa tubig.
Si Vicky nga 39 anyos na sa karun, nakabatyag sang kakibot kag kasadya sang makita ang hitsura sang iya amay sa una nga kahigayunan.
Ginapatihan sa karun sang pamilya nga bangod sa anting-anting amo nga wala nadunot ang bangkay ni Bobby.
Sadto, antes napatay si Bobby ginhatag sini sa bana sang iya bayaw nga si Esmeraldo ang anting-anting.
Sang napatay si Esmeraldo sa cancer sang 2015, ang anting-anting ginbilin sa isa sa utod sini apang ginsunog ni Victoria bangod wala ini nagapati sa mga amo nga butang.
Samtang, ginapatihan nalang ni Vicky nga ginahulat lamang sang iya amay nga ma-upod ang iya asawa kag bilang respeto, wala na gintandog pa sang pamilya ang bangkay ni Bobby kag gintongtong na lang sa babaw ang lungon sang iya asawa nga si Victoria.
