Ginkumpirmar sang barangay secretary sang Barangay Alyansa sa syudad sang Bago nga may yara sang nagpadangat reklamo sa barangay bangud sa madamo nga langaw nagikan sa Macasa Poultry Farm.
Sa interview sang Bombo Radyo Bacolod kay Loremil Valenzuela, may yara sang mga complaint nga nagdangat sa Barangay nagikan sa Purok Mahirop kag Purok Pag-asa bangud sa kadamuon sang langaw sa tion nga magharvest ang nasambit nga poutry.
Suno kay Valenzuela sang Mayo 2, 2022 may yara sila sang nabaton nga petition nga pirmado sang mga pumuluyo batok sa Macasa Poultry Farm bangud sa madamo nga langaw nga naghalin diri apisar nga malayo na sa poultry farm ang mga pamalay.
Ginpahayag man sang Barangay Secretary nga sang September 2021 may yara man sila sang petition nga nabaton nagikan sa mga pumuluyo sa kaangay nga reklamo.
Ginpahayag man ni Valenzuela nga ang Barangay Ayungon sa syudad sang La Carlota nga nagareklamo man kag mahimo nga ginpadangat na direkta sa Local Government Unit (LGU) sa syudad sang Bago.
Suno pa diri napakadtuan na sang syudad ang nasambit nga farm para sa inspection kag ginmanduan nga indi magbalik sa operasyon samtang wala pa nila nacomply ang mga rekesitos.
Pila sa mga dapat nga icomply ang mortality pit ukon ang ginahabuyan sang patay nga manok nga kinahanglan na nga maghimuan sang bag-o kasubong man ang pagrepair sang mga leaks sang bintana sang poultry.
Sa karun padayon ang ila monitoring kun nagacomply na ang mga ini sang ginapangayo sang syudad.
Suno sa Barangay Secretary ang tanan nga reklamo sang mga residente ang ila man ginacater kag ginahatagan sang nagakaigo nga atensyon kasubong man nga ginapatsekyar gilayon sang ila punong barangay agud nga mahimuan sang solusyon.
