Ginpahayag sang Barangay Kagawad sang Barangay E. Lopez, Silay City, Negros Occidental nga wala man nagsapak ang iban nga residente sang nakabati sa pag-ugayong sa balay sang mag-utod nga Bornales sa Hacienda Badiang sa nasambit nga Barangay.
Sa interview sang Bombo Radyo Bacolod kay Barangay Kagawad Ramy Belandres sang Barangay E. Lopez, nagtawag sa iya ang personnel sang Violence Against Women and Children (VAWC) sang Barangay agud nga magpahibalo sang nagluntad nga krimen kun sa diin gilayon ang mga ini nga nagpadulong sa balay sang mga biktima.
Suno kay Belandres, ang patay nalang nga bata ang ila nga naabtan bangud ang duha ang gindala na sa ospital sang mga rescuers.
Suno diri, alegasyon sang mga residente ang 9 anyos nga babayi nga napatay ang gin-alegar nga ginpukpok sang suspek sang bato sa ulo kag sa likod, samtang ang 4 anyos nga gindala sa ospital ang gin-alegar nalukat ang mga mata kag ang 14 anyos naman ang nawasak ang sag-ang.
Suno sa Barangay Kagawad nga ang kaangay nga insidente ang indi hilimuon sang normal nga tawo, kundi hinimuan sang abnormal, nakagamit sang illegal nga druga, ukon nakainum sang makahulubog nga ilimnon.
Pahayag ni Bernales nga suno sa mga residente, nga masami nagakadto sa lugar ang barkada sang 14 anyos sa ila puluy-an kun sa diin partner-partner pa ang mga ini.
Bangud nagahuran ang iban nga residente ginpadangat nila ini sa Barangay nga ginpakadtuan sang Barangay Tanod, apang ginpahayag sang pamilya sang mga biktima nga pabay-an na lamang ang mga ini bangud wala man nagapanghilabot.
Bangud sini wala na sang may nagtawag sa Barangay bisan pa nga may nabatian nga gahod.
Wala man mapat-od kun kaagahon natabo ang insidente, apang antes pa man natukiban ang natabo sa mga bata may nabatian ang mga residente nga ugayong apang wala na nila ginsapak.
Suno kay Bernales kun wala pa nakapauli ang amay wala pa mahibaluan ang natabo sa mga kabataan.
