Wala na sang kabuhi ang 21 anyos nga barker sang nasapwan sa bakante nga lote sa tabok sang Fr. Gratian Murray Integrated School sa Hda. Carmen, Barangay Granada, Bacolod City kaina sang aga.
Ginkilala ang biktima kay Erwin Abitong, 21 anyos, kag residente sang nasambit nga barangay.
Ang bangkay ang nakit-an sang tag-iya sang salakyan nga nagapark sa tupad sang lawas gani nagpangayo ini sang bulig sa mga tricycle drivers sa palibot.
Si Abitong ang may madamo nga pilas tuga sang pagbuno kag labo sa lawas.
Sa interview sang Bombo Radyo Bacolod sa asawa sang biktima nga si Jenny Ann Ocampo, alas 6:00 kaina sang aga, may nagkadto sa iya nga kilala sang bana sini agud magpahibalo sa natabo sa biktima.
Suno kay Ocampo, alas-4:00 ang takna kahapon sang hapon naglisensya ang biktima nga maglakat agud magbarker sa reclamation area.
Suno diri, ang biktima ang nagatrabaho sa construction sadto sa tabok sang Libertad Market kag sa karun naga-barker na ini ukon nagapaparking sang mga salakyan sa carnival sa reclamation area humalin sang nagsugod ang MassKara Festival.
Ginpahayag man sini nga alas 4:00 ang takna kaina sang kaagahon nakabugtaw ini bangud nagkabalaka ini nga wala nakapauli ang bana.
Nagkadto siya sa abyan sang biktima apang wala man nakapadulong didto ang biktima.
Suno kay Ocampo, wala man siya nakahibalo kun sin-o ang suspetsado sa pagpatay sa iya bana bangud wala man ini sang kontra.
Apang sadto may yara sang nagmensahe sa messenger nga kaangay may pamahog apang wala naman ini nagpadayon bangud nadelete naman ang messenger account sang biktima.
